Cumartesi , Ocak 16 2021
fatr
Ana Sayfa / ٍSon Yazı / سکسن بئش هایخیریشینینگ ایل دؤنومونه گؤره

سکسن بئش هایخیریشینینگ ایل دؤنومونه گؤره

سکسن بئش ایلینـده بیز قاشقاییلارینگ چوخو هنیز الیمیزدن چالینان کیملیگیمیزی بولا بیلمه میشدیک. هنیز اوخوللاردا تات اؤگرتچیلر بیزی هنک ائدیب تورک اولدوغوموز ایچین آششاغیلانیردیگ. تورکچولوک ایندیکی تکین یایقین دگیلیدی. سانال دونیانینگ ایندیکی‌سی لگین گئنگیش اولمادیغی دا بیز قاشقاییلارینگ آیری تورکلردن خبرسیز قالدیغیمیزی آرتیردی.

پان­ایرانیسم­ینگ چیرکین بارماقلاری «ایران» گوندَلیگینینگ سایفالارینی بولامیشدی و بیز قاشقاییلارین هئچ روحو دا خبر اولمامیشیدی!

«مانا نئیئستانی» آدیندا بیر آلچاق آدام، بو گوند‌لیکـده بیر نئچچه بؤیجوک چکیب اونلاری قاشقایی لهجه‌سین‌ده دانیشتیرمیشدی! پیسپیسالار تورک دیلینده و بیز قاشقاییلارینگ لهجه‌سینده دانیشیردیلار و یازان دئییردی بو بؤیجوکلر بیربیر دیلینی ده بیلمیرلر! (قاشقاییلار آزاربایجانلیلارینگ دیلینی بیلمیرلر!).

اوندا بیز قاشقاییلار آغیر بیر یوخخوداییدیگ! چونکو تبریزده، اورمودا، اردبیل‌ده، زانگان‌دا، تئهران‌دا و بوتون آزاربایجان شهرلرینده، نئچچه میلیون تورک بو فاشیتی ایشه ایعتیراض ائتدیلر، نئچچه مینگ تورک ایگیدینی ایران حکومتی توتوب دوستاغا سالدی و چوخ آدام بو یولدا اؤلومه گئتدی. تورکلوک یولوندا چوخ جانلار اوچوپ گئتدی و یئنگی تورکچولوغونگ دیرگی دیرچلدی.

بیر آچیدان دئیه­بیلریک، ایران آدلی تورپاقلاردا یاشایان تورکلر بیز قاشقایی­لارینگ غیرتینی چکدیلر و دؤشلرینی دوشمان گولـله‌سینه سیپر ائتدیلر اما بیز هئچ روحوموز دا خبر اولمادی!!

آزاربایجان بوتون تاریخ بویو تورکلوگونگ جوشان قایناغی­ییمیش. ایندی ده بو تورپاقلاردا یاشایان تورکلرینگ بؤیوک قارداشی تکین آزادلیغا ساری گئدن یولدا بیزلره بلتچی‌لیک ائدیر.

اون دؤرد ایل بون‌دان گئری اؤلن باجی قارداشلاریمیزی هئچ گؤروب تانیمامیش اولساگ دا، اورمو تبریز کوچه‌لرینده فاشیستلرینگ چوماغی آلتیندا سوموکلریمیز قیریلمیش اولماسا دا، گؤزوموزونگ قاباغیندا قارداشیمیزینگ اؤلومونو گؤرموش اولماساگ دا، بیز قاشقایی تورکلری بورادان هارای چکیب دونیایا سس سالیریگ کی:

بو یول گئدر تبریزه!

گؤگدن داش یاغسا، یئردن قان جوشسا، جان تندن آشسا بیزیم ایچین تورکلوک یولو بیردیر!

بونا گؤره دئییریک:

شیرازدان باشلایان، تبریزدن گچمه‌ین یول…

اورمویو چالقافایا باغلامایان یول…

هئیرانی هایقیرا چاغیرمایان یول…

خوراسانی چارماهالا گؤرستمه‌ین یول…

بیزیم یول اولاماز!

بیزیم یولوموز بیرلیک یولودور. تبریزدن گچیر بو قوتلو یول، سولدوزدان، قوروادان گچیر.

بو گون بوتون تورکچولره قوتلو اولسون.

 

 

Latin :

Səksən beş hayxırışınıng ildönümünə görə

 

Səksən beş ilində biz qaşqayılarıng çoxu həniz əlimizdən çalınan kimliğimizi bulabilməmişdik. Həniz oxullarda tat öğrətçilər bizi hənək edib Türk olduğumuz için aşşağılanırdıg. Türkçülük indiki təkin yayqın dəğilidi. sanal dunyanıng indikisi ləğin gengiş olmadığı da biz Qaşqayılarıng ayrı Türklərdən xəbərsiz qaldığımızı artırdı.

Panİranism’ing çirkin barmaqları “İRAN” gündəliğining sayfalarını bulamışdı ve biz Qaşqayıların heç ruhu da xəbər olmamışıdı!

“Mana Neyestani” adinda bir alçaq adam, bu gündəlikdə bir neççə böycük çəkib onları Qaşqayı ləhcəsində danıştırmışdı! Pıspısalar Türk dilində və biz Qaşqayılarıng ləhcəsində danışırdılar və yazan deyirdi bu böycüklər birbir dilini də bilmirlər! (Qaşqayılar Azarbaycanlılarıng dilini bilmirlər!).

Onda biz Qaşqayılar ağır bir yuxxudayıdıg! Çünkü Təbrizdə, Urmuda, Ərdəbildə, Zanganda, Tehranda və bütün azarbaycan şəhrlərində, neççə milyon Türk bu Faşiti işə itiraz etdilər, neççə ming Türk iğidini İran hukuməti tutub dostağa saldı ve çox adam bu yolda ölümə getdi. Türklük yolunda çox canlar uçup getdi və yengi Türkçülüğüng dirəği dirçəldi.

Bir açıdan deyəbilərik, İran adlı torpaqlarda yaşayan türklər biz Qaşqayılarıng qirətini çəkdilər və döşlərini duşman gülləsinə sipər etdilər amma biz heç ruhumuz da xəbər olmadı!!

Azarbaycan bütün tarıx boyu Türklüğüng coşan qaynağıyımış. İndi də bu torpaqlarda yaşayan türkləring böyük qardaşı təkin azadlığa sarı gedən yolda bizlərə bələtçilik edir.

On dörd il bundan geri ölən bacı qardaşlarımızı heç görüb tanımamış olsag da, urmu təbriz küçələrində faşistləring çomağı altında sümüklərimiz qırılmış olmasa da, gözümüzüng qabağında qardaşımızıng ölümünü görmüş olmasag da, biz Qaşqayı Türkləri buradan haray çəkib dunyaya səs salırıg ki:

Bu yol gedər Təbrizə!

Göydən daş yağsa, yerdən qan coşsa, can təndən aşsa bizim için Türklük yulu birdir!

Buna görə deyirik:

Şirazdan başlayan, Təbrizdən gəçməyən yol…

Urmuyu Çalqafaya bağlamayan yol…

Heyranı Hayqıra çağırmayan yol…

Xorasanı Çarmahala görsətməyən yol…

Bizim Yol olamaz!

Bizim Yolumuz birlik yoludur. Təbrizdən gəçir bu qutlu yol, Sulduzdan, Qurvadan gəçir.

Bu gün bütün Türkçülərə qutlu olsun.

 

در این باره به تاجیکی بخوانید 

 

 

 

 

 

 

 

Paylaşınız

Bir cevap yazın

E-posta hesabınız yayımlanmayacak. Gerekli alanlar * ile işaretlenmişlerdir

Cresta Help Chat
gönder